СУПЕРСТАН: "Эх, менин парталашым..."

SUPER.KG порталынын "Суперстан" бөлүмүндө "Мектепте ким менен бир партага отургуңуз келчү?" деген тема талкууга алынууда.

Темадагы билдирүүлөр:

"Мектепте 9-классты бүткөнгө чейин үч кыз менен отурганмын. Анан булар менен отурамын деп айтчу эмес экенмин, класс жетекчи өзү отургузуп койчу".

"Менин эсимдин баары жанымда ким отурса эмес, арткы же биринчи партада отуруп калбасам экен деген ой болчу".

"Бир классташым бар эле, ал мени абдан жакшы көрчү. Экөөбүз бир партада отурчубуз, ар нерсени айтып берип, түшүнө мен киргеним тууралуу айтып тажатчу. Биздин класстагы менин жакын курбум башка бала менен отурчу. Ал баладан экөөбүз алмашалы деп көп сурандым. Кийин менин жанымда отурган бала 8-9-класстарда мектептин эӊ сулуу жигити болуп кеткен. Ал экөөбүз жакын дос болуп жүрүп, көп кутурдук. Канча жолу доскага чыктык, бурчка турдук. 9-классты бүткөндөн кийин мектептен кеткенбиз. Азыр кезиккенде "сен мага абдан жакчу элеӊ, бирок сен мени тоготпой койгонсуң" деп айтып калат. Башка парталаштарым эсиме келген жок".

"Менин жаныма начар окуган балдарды отургузчу. 8-класстан баштап өзүмдөн да жакшы окуган бала менен отуруп калдым. Экөөбүздүн тең боюбуз узун болгондуктан артка жылып кеттик. Эсте калган парталашым ушул экен. Анын телефонунан көрсөткөн анекдоту эле эстен кетпейт. Эх, менин парталашым".

"8-класска чейин мугалимдин алдында отургум келе берчү. Класс жетекчибиз башка жакка отургузуп койсо, башка мугалимдердин сабактарында алдыга отуруп алчумун. Өзүм жалгыз отурганды жактырар элем. 9-класстан баштап эӊ арткы орундуктарды "менчиктештире" баштагам".

Талкууга кошулгуңуз келсе, бул жакка кириңиз.