Чек ара кызматы: Аксыдагы Өзбекстан талашып жаткан 45 сотых жер - такталган тилке

Буга чейин өзбек чек арачылары Аксы районунун Сөгөт айылынын аймагындагы 45 сотых жер тилкесин басып алганы кабарланган. Мамлекеттик чек ара кызматы аталган тилке такталган тилке экенин билдирди.

"Айтылган тилкеде Мамлекеттик каттоо кызматынын эксперттеринин катышуусунда Кыргыз Республикасынын жана Өзбекстандын чек ара өкүлдөрүнүн жолугушуусу жүрүп, анда аталган маселе талкууланууда. Сөгөт жергеси такталган тилке болуп эсептелет. Өзбекстандын чек арачылары тарабынан мамлекеттик чек араны бузуу фактысы катталган эмес. Мамлекеттик чек аранын айтылган тилкеси штаттык режимде кайтарылууда, кырдаал Чек ара кызматынын көзөмөлүндө", - деп билдиришти мекемеден.

Аксы районунун мамлекеттик администрациясынын аппарат башчысы Алтын Кутмановдун SUPER.KG'ге билдиришинче, 30-июнда өзбек чек арачылары кыргыз тарап пайдаланып жаткан жайытка кыргыз жарандарын өткөрбөй коюшкан.

"Сөгөт аймагындагы 45 сотых жерди буга чейин кыргыз тарап иштетип келген. Бул жер такталбаган аймак болгон. Ал жерди Замир Баназаров аттуу жергиликтүү тургун жайыт катары иштетип жүргөн. Өзбек тараптын күзөт аскерлери чек араны кайтаруу учурунда ушундай кадамдарга барышкан", - деп билдирген Кутманов.