Ысык-Көл облусундагы ипподромду курууга жалпысынан 988 миллион сом бөлүндү

Ысык-Көл облусунун Бостери айылдык аймагына караштуу Бактуу-Долоноту айылындагы ипподромду реконструкциялоого жана курууга азыркы учурда 988 миллион сом бөлүнүп берилди. Бул тууралуу Каржы министрлигинин басма сөз кызматы кабарлады.

Бул иш-чарага жалпы 1 миллиард 234 миллион сом өлчөмүндөгү акча каражаты каралган.

Кыргыз Республикасынын Өкмөтүнүн 2015-жылдын 8-декабрындагы №594-буйругунун негизинде ипподромду долбоорлоого жана реконструкциялоого керектелүүчү акча каражатын камсыз кылуу Кыргыз Республикасынын Каржы министрлигине тапшырылган.

Ошондой эле ипподромду реконструкциялоого жана курууга Кыргыз Республикасынын Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигине бөлүп берүү үчүн 480 миллион сом каралган. Ипподромдун чуркоочу жолун эл аралык стандарттын деңгээлине жеткирүү максатында 248 миллион сом каралган.

Мындан тышкары Кыргыз Республикасынын Өкмөтүнүн 2016-жылдын 17-июнундагы №273-буйругу менен 506 миллион сом өлчөмүндө кошумча каражат каралган, анын 260 миллион сому бөлүнүп берилди.

Бүгүнкү күндө каржылана элек акча каражатынын көлөмү 246 миллион сомду түзөт.