Тайлак баатырдын күмбөзүн тосууга 1 миллион 700 миң сом бөлүндү

Тайлак баатырдын күмбөзүн тосууга 1 миллион 700 миң сом бөлүндү. Бул тууралуу бүгүн, 5-июлда SUPER.KG порталына Ак-Талаа районунун акиминин 1-орун басары Абдымалик Сулайманов билдирди.

Маалыматка ылайык, баатырдын 220 жылдык салтанаты Соң-Көл жайлоосунун Таш-Дөбө жайытында өткөрүлөт. Иш-чараны белгилөө үчүн кызуу аракеттер көрүлүүдө.

"Тайлак баатырдын Куртка айыл аймагындагы күмбөзүнүн айланасын тосуу үчүн мамлекеттик бюджеттен 1 миллион 700 миң сом каражат бөлүндү. Учурда 80 сотых жерди тосуу иштери жүргүзүлүүдө", - деп кошумчалады Сулайманов.

"Бөлүнгөн каражатка күмбөздүн айланасына унаа токтоочу жер даярдалат. Ал эми келечекте Тайлак баатырдын күмбөзүн тарыхый эстеликтердин катарына киргизүүгө аракет жасалат", - деп кошумчалады Сулайманов.

Белгилей кетсек, Тайлак баатырдын 220 жылдыгы ушул жылдын 30-июль күнү мамлекеттик деңгээлде өткөрүлөт.