Карылар үйүндө Айт майрамы белгиленди (фото)

Бүгүн, 5-июлда Төмөнкү Серафимовка социалдык стационардык мекемесинде Орозо айт майрамына карата майрамдык иш-чара өттү. Айт майрамы менен куттуктоо сөздөрү айтылып, карыларга чакан белектер ыйгарылган соң майрамдык түштөнүү уюштурулуп, концерттик программа менен жыйынтыкталды.

Карылар үйүнүн башкы мүдүрү Бактыбек Жунусовдун айтымында, бул жайда 370 адам бар.

"Жыл сайын майрамдарда бул жерде жашагандардын маанайын көтөрүп, майрамдык иш-чараларды уюштуруп турабыз. Бизде азыр 370 адам бар болсо, алардын 230у эркек, 140ы аялдар. Аларды 232 кызматкер тейлейт. Союз убагында славян улутундагылар көп болчу. Советтер Союзу тарагандан кийин карылар үйүндө кыргыздар көбөйүп калды. Ата-энесин таштап кетип жаткан балдар туура эмес тарбия алышкан деп ойлойм. Мындагылардын 80 пайызынын жакындары, балдары бар, бирок көпчүлүгү бул жерде жаткандарды көргөнү келишпейт", - деп айтты Бактыбек Жунусов.