Евро-2016: Бүгүн жарым финалда Португалия курамасы Уэльс менен беттешет (анонс)

ПОРТУГАЛИЯ-УЭЛЬС
Лион шаары. "Стад-де-Лион" стадиону
Калыс: Юнас Эрикссон (Швеция)
Башталышы: 01:00 (Бишкек сааты боюнча)

Португалия жана Уэльс курамасы буга чейин кайсы бир мелдештин алкагында жолуккан эмес. 3 жолдоштук беттеш өткөрүшүп, анын экөөндө португалиялыктар жеңип чыгышкан. 1 беттеш Уэльстин жеңиши менен аяктаган. Бул жолу командалар Европа чемпиондугунун жарым финалында кез келип отурушат. Албетте, бул баскычка жетүү үчүн командалар тер төгүп, көп күч сарпташты.

Мисалы, Уэльс курамасы тайпадан чыккан соң Түндүк Ирландия менен беттешип, минималдуу эсепте жеңишке жетишкен. Гарет Бэйл баштаган уэльстиктер чейрек финалда айыгышкан оюн өткөрүштү, себеби алар Бельгия курамасы менен беттешип, кыйынчылык менен жеңишти өз эсебине оодарышты.

Ал эми Португалия курамасы атаандашынан айырмаланып, беттештин негизги убактысында (90 мүнөттө) жеңишке жетише элек. Аларды бул үчүн сындагандар көп, бирок команда жарым финалга карай Хорватия менен Польшанын эбин тапканы команданын оңой жоо эмес экенинен кабар берет.

Команда лидерлеринин көрсөткүчтөрү тууралуу айта турган болсок, Гарет Бэйл командасынын бардык оюндарына катышып, 3 гол киргизди. Ал эми Криштиану Роналдунун эсебинде 2 гол бар. "Реал" клубунда чогуу ойногон футболчулар бүгүн эмненин үстүнөн чыгып, кимиси командасын финалга алып чыгарын убакыт көрсөтөт...