Президенттин кызы Алмазбек Атамбаевдин дагы бир эл билбеген өнөрү бар экенин айтып чыкты

2-июлда президент Алмазбек Атамбаевдин "Судьбе назло" деген ыры интернетке чыккан. Интернет ааламында кызуу талкууга алынып, көпчүлүгү жакшы ой-пикирлерин билдиришкен. Кечээ, 5-июлда өлкө башчынын кызы Алия Шагиева атасынын гитара ырларынын жыйнагын чыгаруусу менен куттуктап, ага болгон сүйүүсү, жылуу сезимдери тууралуу өздүк баракчасына жазып чыкты. Алия Шагиеванын текстин өзгөртүүсүз беребиз.

"Атам үчүн открытка жасадым. Ичине эмне деп жазганымды айтпай эле коёюн, себеби чыныгы сезимдер тууралуу кыйкырып айтууга болбойт. Жакшы көрөм, жакшы көрөм, жакшы көрөм жана аны гитара ырларынын жыйнагын чыгаруусу менен куттуктайм! Атамдын мээни эс алдырган, жашоого өмүр кошкон, жылмаюу чакырган көңүлдүн иши менен алектенип баштаганы мени абдан кубандырат. Мен аны дайыма чыгармачыл инсан катары кабыл алчумун. Бул да жөн жерден эмес. Ал жаш кезинен музыка жаратып, ырларды жазчу, элестеткиле, жадакалса сүрөт да тартчу. Жакында эле анын жаш кезинде, менин курагымдагы кезде тарткан сүрөт альбомун барактап калдым. Искусствого болгон шык мага андан өткөн. Рахмат, рахмат! Ал тууралуу эмнелер айтылбасын, мага маанилүү эмес, саясатты такыр түшүнбөйм. Тааныш эмес адамдардан айырмаланып, мен аны жакындан билем. Тынч абалда ойлонуп отурган көз карашын билем, түн бир оокумда ойлору менен алышып, ойгонуп кеткен жүзүн билем. Ал мыкты! Дүйнөдө эч бир сөз мени мындай ойдон кайтара албайт", - деп жазып чыккан.