Кыргыз Республикасынын жараны кош жарандуулукка ээ боло алат

4-июль күнү Стамбулда “Ислам мамлекети” менен байланышта болгон” деп шектелип 2 кыргыз жараны кармалгандыгы тууралуу жазылган. Маалыматка ылайык, кармалгандардын биринде Орусиянын жана Кыргыз Республикасынын паспорту болсо, экинчисинде Кыргыз Республикасынын паспорту болгон. Кабарга түшкөн комментарийлерден улам "Бир эле учурда кыргыз жараны дагы башка өлкөнүн жарандыгын алуу мүмкүнчүлүгүнө ээ боло алабы?" деген суроо менен Мамлекеттик каттоо кызматына кайрылдык.

"Кыргыз Республикасынын жарандыгы" тууралуу мыйзамдын 6-беренеси боюнча кыргыз жарандыгы менен бирге башка өлкөнүн жарандыгын алуу мүмкүн. Ал үчүн, биринчиден, экинчи өлкө менен Кыргыз Республикасынын дипломатиялык кызмат алакасы бар болушу керек. Экинчиден, ал өлкөнүн мыйзамы кош жарандуулукка жол бериши керек. Үчүнчүдөн, экинчи өлкөнүн экономикасына чоң көлөмдө инвестиция салышы керек болот", - деди Мамлекеттик каттоо кызматынын коомчулук менен байланыш бөлүмүнүн башчысы Мелис Эржигитов.

"Бирок экинчи өлкөнүн жарандыгын алгандар үчүн чектөөлөр болот.

1. Мамлекеттик кызматтарда иштей албайт;
2. Аскердик кызматтарда иштей албайт;
3. Мамлекеттик башкарууга кызматка бара албайт (шайлоодо талапкер боло албайт);

Андай жарандар атайын мамлекеттик реестрге киргизилип, көзөмөлдөнүшөт", - деп кошумчалады Эржигитов.