Чүйдө туристтик сезон үчүн жарандарды кабыл алуучу милициянын көчмө кабылдамасы ишке кирди (фото)

Чүйдө туристтик сезон үчүн жарандарды кабыл алуучу милициянын көчмө кабылдамасы ишке кирди. Анын ачылыш аземи бүгүн, 9-июлда болуп, иш-чарага Чүй ОИИББинин башчысы Капар Батырканов жана ИИМдин Патрулдук милиция башкы башкармалыгынын башчысы Эркин Баев катышты.

Капар Батырканов өз сөзүндө: “Милициянын көчмө кабылдамасы Чүй облусунун аймагында жашоочулардын жана чет элдик жарандардын коопсуздугун камсыздайт”, - деди.

Эки көчмө кабылдама бүгүндөн баштап ишке кирет. Анда үчтөн кызматкер эки нөөмөт менен иштейт. Бири Токмок шаарына чейинки аралыкты караса, экинчиси Чүй облусунун Ысык-Көл облусу менен чектешкен жерине чейинки аймакты карайт. Анда жарандар жакынкы милиция бөлүмчөсүнө барып отурбастан, көчмө кабылдаманын ичинде арыз жазып, тиешелүү жардам ала алышат.