Ирандагы эрежесиз мушташ боюнча мелдеште 3 кыргыз мушкери атаандаштарын мөөнөтүнөн мурда утушту (фоторепортаж)

Кечээ, 11-июлда Ирандын Керманшах шаарында эрежесиз мушташ боюнча эл аралык мелдеш болуп өттү. WEF PROFFIGHT-5 "Persian Warriors" деп аталган мелдеште Иран, Ирак, Казакстан, Кыргыз Республикасы, Ооганстан, Өзбекстан сыяктуу мамлекеттердин спортчулары катышты.

SUPER.KG порталына Дүйнөлүк Эр таймаш федерациясынын президенти Руслан Кыдырмышев кабарлагандай, анда 3 кыргыз мушкери бирден беттеш өткөрүштү. Күндүн башкы беттешинде 77 килограмм салмакта Самат Эмилбеков атаандашы ирандык Фарзад Гадерини 1-раундда утуп алды. Жеңиш үчүн Саматка 2 мүнөт 32 секунда жетиштүү болду.

Мекендешибиз Нурлан Токтобакиев болсо 93 килограмм салмакта ирандык Вадих Корманджири менен кез келди. Кызуу башталган беттеш 1-раундда жыйынтыкталып, Нурлан атаандашты ыкмага салып, кысып утуп алды.

Дагы бир спортчубуз Бусурманкул Абдибайт уулу 66 килограмм салмакта 8 бурчтукка чыкты. Ал дагы башка кыргыз спортчуларындай эле жеңишти 1-раундда камсыздады. Ал атаандашы Реза Разавинин колун чоюп, жер чабууга мажбур кылды.