Жабырлануучу тарап Канжар Кадыралиевдин камакка алынуусун талап кылып чыкты

Экс-депутат Ыргал Кадыралиеванын бир тууган агасы Канжар Кадыралиевден жабыр тарткан тарап бүгүн кайрадан анын камалуусун талап кылууда. Жабыр тарткан ишкер Сактан Келдибаевдин эжеси Уулкан Келдибаева SUPER.KG'ге Кадыралиевди үй камагында калтырбоо керектигин айтты. "Эки жылдан бери укук коргоо органдары ага жетиштүү чара көрө албай жатат. Соттук отурум улам-улам кийинкиге жылдырылып келет. Бир жактоочусу келсе, экинчиси келбей коёт. Экинчи жактоочу жоктугуна байланыштуу отурум кийинкиге калтырылууда. Учурда иш Бишкек шаарынын Октябрь райондук сотунда. Буга чейин Ош шаардык сотунда болуп, жактоочулардын өтүнүчү менен Бишкекке которулган. Эми кайра Ошко которууну өтүнүп жатышат. Оштун соту ага эч кандай чара көрө албайт. Ошондуктан Кадыралиевдин камалуусун талап кылып жатабыз", - деди Келдибаева.

Эскерте кетсек, Жогорку Сот 2016-жылдын 27-январында Кадыралиевди үй камагында кармоо боюнча Октябрь райондук сотунун чечимин күчүндө калтырган.

Башкы прокуратура 2014-жылдын 30-сентябрында, 14-ноябрында жана 5-декабрында Канжар Кадыралиевге карата “бейбаштык”, “өзүм билемдик” жана “зомбулук көрсөтүү менен талап кылуу” беренелери боюнча кылмыш ишин козгоп, ээлеген кызматынан бошоткон.

Андан соң Ош шаардык соту аны камакка алуу чечимин чыгарып, издөө жарыялаган. 2015-жылдын 26-мартында Кадыралиев Башкы прокуратурага өз эрки менен келген, андан кийин ден соолугуна байланыштуу ооруканага жаткырылганы жарыяланган.