Азия чемпиондугун багынтып, алтын медаль тагынган спортчуну Ош шаардык мэриясы тосуп алды

Азия чемпиондугун багынтып, алтын медаль тагынган спортчуну Ош шаардык мэриясы тосуп алды. Бул тууралуу бүгүн, 13-июлда Ош шаардык мэриянын басма сөз кызматынан билдиришти.

Маалыматка ылайык, Кытайда өткөн грек-рим күрөшү боюнча эл аралык мелдеште ийгилик жаратып, алтын медаль тагынган спортчу Акжол Махмудовду Ош шаарынын мэриясынан атайын өкүлдөр салтанаттуу тосуп алышты.

Белгилей кетсек, Азия чемпиондугу 7-июлдан 10-июлга чейин Кытайдын Тайчжунг шаарында өткөн. Акжол Махмудов 69 килограмм салмакта күч сынашып, алтын медаль тагынган. Чемпиондук наамды 400гө жакын балбан талашкан.

Кыргыз Республикасынан барган курама команда командалык тайпада 3-орунду багындырып, 2 алтын, 1 күмүш, 4 коло медаль менен кайтышты.

Ош шаарынын вице-мэри Асылбек Топчубаев спортчуга ак калпак кийгизип, жетишкен ийгиликтер менен куттуктады.

Буга чейин Акжол Махмудов 2014-жылы Индияда өткөн грек-рим күрөшү боюнча мелдеште да биринчиликти камсыздап, Азия чемпиондугу аталган.