СУПЕРСТАН: "Ата-эне балдарынын чөнтөгүнө карап мамиле кылган заман келдиби?"

SUPER.KG порталынын "Суперстан" бөлүмүндө "Ата-эне балдарынын чөнтөгүнө карап мамиле кылган заман келдиби?" деген тема талкууга алынууда.

Темадагы билдирүүлөр:

"Менимче, мындай болушу мүмкүн эмес, ата-эне үчүн бардык балдары бирдей болсо керек. Тескерисинче, чөнтөгү жука, алсызыраак баласын аяп турушат эмеспи".

"Тобо кылдым, мындай күнгө калбайлы ылайым. "Бирок" деген жери бар, жашоодо ушуга окшогон көрүнүштөрдү көрүп эле жүрөбүз. Мындай сөз эч качан өзүнөн өзү чыкпайт. Балким, өз жашоосунда же чөйрөсүндө көрүп жүргөндөр айтып жатышкандыр. Менимче, мындай чоң айыпты ата-энелерге карата койгонубуз аларга орой болуп калат".

"Ата-энени балдарынын акчасына карап мамиле кылат деп айтууга мүмкүн эмес. Мисалы, апам мени менен көп акылдашат, мага көп нерсесин айтат. Сиңдиме анча айта бербейт. Мен апамдарга акчалай деле жардам көрсөтпөйм. Бул ата-эненин жөн эле балдарына болгон мамилеси. Аны акчага салыштырууга болбойт. Апаны кимдир бирөөсү жакшы түшүнөт, кимдир бирөөсү өтө эле кабатыр кылат. Ушуга окшош себептерден улам ага айтпай эле коюусун туура көрөт. Балдарынын бирөөсү чыйрак, эпчил болот, ошону менен акылдашат".

"Таң калгыбыз келбегени менен, бул ачуу чындык. Бардык ата-эне дегенден алысмын, бирок ошондойлор да бар. Жөнөкөй мисал, азыр кээ бир ата-энелер үйүндө кимиси жакшы тапса, "бизди ушул багат" деп ошонусун алып калышат. Мен угуп, көрүп эле жүрөм мындайларды. Мындай нерсе биздин үй-бүлөдөн алыс болсун деп тилейм. Менин ата-энем баарыбызга бирдей мамиле кылат".

"Азыр акчаны көбүрөөк тапкандын сөзү да өтүмдүүрөөк болуп калды. Ата-эне эле эмес, бир туугандар да улуунун эмес, көп тапканынын айтканын көбүрөөк кылып турушат. Мындайча айтканда, ким көп тапса, бир туугандардын арасында ошол абройлуураак болуп калды".

Талкууга кошулгуңуз келсе, бул жакка кириңиз.