Ушул жылга жөлөк пул үчүн бюджеттен 1 миллиард 200 миллион сом каралган

Аз камсыз болгон үй-бүлөлөрдүн балдарына ай сайын 294 300 сом төлөнүп турат. Бул тууралуу Эмгек жана социалдык өнүгүү министрлигинин басма сөз кызматы бүгүн, 15-июлда билдирди.

Эмгек жана социалдык өнүгүү министри Кудайберген Базарбаевдин айтымында, өткөн жылдын ушул убагына салыштырмалуу жөлөк пул алуучулардын саны 5,2 пайызга төмөндөгөн.

"Өткөн жылы 310 300 аз камсыз бала жөлөк пул алган. Жөлөк пулдун так дарекке жеткирилүүсү жана элдин кирешесинин өсүшү аз камсыз болгон балдардын санын 16 миңге азайтты. Жалпысынан 2013-жылдан бери 40 миңден ашуун баланын үй-бүлөсү жакырчылыктан чыгарылган", - деди министр.

Аз камсыз болгон үй-бүлөдө жашаган ар бир жан башына кепилденген эң төмөнкү киреше 810 сом өлчөмүнөн ашпаган шартта гана балдар үчүн жөлөк пул берилет. Бул жөлөк пул 2012-жылдан 2015-жылга чейин 370 сомдон 810 сомго чейин көтөрүлгөн. Ушул жылга жөлөк пул үчүн бюджеттен 1 миллиард 200 миллион сом каралган.