Орусиянын спорт министри: "Футбол боюнча улуттук курам таратылды"

Расмий Кремль Орусия футбол боюнча курамасын таратуу тууралуу петицияга жооп берди. Петициянын автору Артём Хасанов Орусиянын президентинин администрациясынан жооп алганын маалымдады.

Петициянын мазмунун негизинен кескин сын-пикирлер түзүп, “Биз уялбай, сыймыктангыбыз келет” деген ураан алдында жазылган. Петицияга расмий Кремль тийиштүү органдарга ар тараптуу иликтөө жүргүзүп, жыйынтык чыгарууну тапшырды. Аталган петиция www.change.org сайтында жайгаштырылып, аны 934 672 футбол күйөрманы колдогон. Кол топтоо негизинен Орусиянын футбол боюнча курамасынын Европа чемпиондугунда начар оюн көргөзүп, тайпасында акыркы орунду ээлеп калганынан улам башталган.

Орусиянын мелдештен четтеп, катуу сынга кабылган кезинде футболчулар Павел Мамаев жана Александр Кокориндин Монте-Карлодо эң кымбат клубда эс алуусу бул нааразычылыктын отуна май тамызгандай болду.

Орусиянын басылмалары спорт министри Виталий Мутконун улуттук курамдын таратылганын айтканын жазып жатышат. Кийинки машыктыруучу курамды кайрадан түзүп чыгып, 2018-жылкы Дүйнө чемпиондугуна даярдамакчы. Машыктыруучунун ысымы 23-июлда белгилүү болот.

Европа чемпиондугунда Орусия курамасы Англия, Уэльс, Словакия курамалары менен "В" тайпасында ойногон. Команда Англия менен тең ойноп (1:1), Словакияга (2:1) жана Уэльске уттуруп жиберген (3:0).