Алматы. "Никольск" базарындагы атышуудан 5 киши жарадар болуп, жандандыруу бөлүмүнө түштү

Алматы шаарындагы атышуудан "Никольск" базарында беш киши жарадар болуп, жандандыруу бөлүмүнө түштү. "Тез жардам" кызматы дагы октон жаракат алгандарды жолдо алып келе жатат. Азырынча жарадар болгондордун саны так эмес. Бул тууралуу жергиликтүү маалымат каражаттары "Тез жардам" кызматына шилтеме берүү менен маалымдады.

"Беш эркек киши учурда жандандыруу бөлүмүндө. Алардын өздүгү тактала элек. Жарадар болгондорду улам алып келүүдө", - деп айтылат маалыматта.

Жергиликтүү бийлик калкты Алмалы районундагы ички иштер бөлүмүнүн аймагына барбоого чакырды. "Учурда ал аймакта кылмышкерди колго түшүрүү операциясы жүрүүдө, бир нече саат ал аймакка баруудан баш тартып туруңуздар", - деп баса белгиленген билдирүүдө.

"Учурда аталган базардын аймагы курчоого алынып, ок атышуулардын үндөрү угулууда. Бир адамдын мойнуна, бир адам курсагына ок тийди", - дешет окуянын күбөлөрү.

Маалыматка ылайык, азыркы тапта шаар ичиндеги курал сатуучу жайлар убактылуу жабылган.

Учурда "Алматы-1" темир жол бекетине жардыруучу зат коюлган" деген маалымат чыгып, аталган бекет курчоого алынганы айтылууда.

Эскерте кетсек, бүгүн эртең менен Алмалы районундагы ички иштер бөлүмүнүн аймагынан белгисиз автоматчан жаран полиция кызматкерлерин көздөй ок чыгарып качкан. Натыйжада 1 полиция кызматкери каза тапкан. Мындан улам Ички иштер департаменти тарабынан шаардын аймагында антитеррордук иш-аракеттер башталган.