Президент Алмазбек Атамбаев "Азия MIX" командасын жеңиши менен куттуктады

Президент Алмазбек Атамбаев "Азия MIX" командасын "Голосящий КиВиН-2016" фестивалындагы жеңиши менен куттуктады. Бул тууралуу бүгүн, 18-июлда Кыргыз Республикасынын Президентинин Аппаратынан билдиришти.

Өлкө башчы "Азия MIX" командасы өзүнүн талыкпас эмгеги, таланты жана чыгармачылык энергиясынын аркасы менен көрүнүктүү жогорку командалардын бири боло алганын баса белгиледи.

"Кыргыздар ар бирибиз чыдамсыздык менен КВНдеги өзүбүздүн жылдыздарыбыздын чыгышын күтүп, силерге боор тартып, сыймыктанабыз", - деди Атамбаев.

Ошондой эле президент "Азия MIX" өзүнүн ийгиликтери менен кыргыз маданиятынын мекениндеги жана чет элдеги өнүгүшүнө салым кошуп, эл аралык аренада өлкөнүн позитивдүү имиджин көтөрүп, кыргыздардын чыгармачылыгын жогорулатып жатканын билдирди.

"Силердин чыгармачылыгыңар жана силердин жеңишиңер мекениңерге керек. Алар кыргыз жаштарына ишенич, баарыбызга өзүбүздүн укмуштуудай мекенибиз менен сыймыктанчу сезимдерди тартуулайт. Силерге жаңы ийгиликтерди каалайм!" - деп айтылат президенттин куттуктоосунда.