ЖЫЛНААМА, 19-ИЮЛЬ: Мындан 32 жыл мурун советтик актриса Фаина Раневская көз жумган

Мындан 32 жыл мурун, 1984-жылы 19-июлда советтик актриса, СССРдин Эл артисти Фаина Раневская 87 жашында оорудан улам Москвада көз жумган. Анын сөөгү Москвадагы "Жаңы Донск" көрүстөнүнө эжеси Изабелланын жанына жерге берилген.

Фаина Георгиевна (Григорьевна) Раневская 1896-жылы 27-августта Орусиянын Таганрог шаарында туулган. Ал Таганрог Мариинск кыздар гимназиясын аяктап, А.Ягеллонун (А.Н.Говбергдин) жеке менчик театр студиясында таалим алган. Ал XX кылымдын гениалдуу актрисаларынын катарын толуктап, жашоого болгон философиялык көз карашы, аткаруу чеберчилиги, татаал нерселерди жөнөкөй тил менен жеткирүү жана тамашакөйлүгү менен эл сүймөнчүлүгүнө ээ болгон. Анын ар бир айткан сөзү коомчулукка кеңири жайылган. Төмөндө актрисанын жашоосундагы кызыктарды жана белгилүү накыл сөздөрүн сунуштайбыз.

Актриса белгилүү орус акыны Александр Пушкиндин чыгармаларына өзгөчө маани берген. Актриса берген маектеринде Пушкин менен кайсы бир мезгилде жолугушкандай же жолугуп калары мүмкүндөй сезилерин билдирген. Тамеки чегүү ден соолугуна олуттуу терс таасирин тийгизип, дарыгерлердин "Кантип дем алып жатасыз?" деген суроосуна "Пушкин менен дем алам" деген жооп узаткан.

Фаина Раневская акын Анна Ахматованын эле периште-коргоочусу болбой (актриса Анна Ахматова келте менен ооруган учурда өзү карап, Ахматованын эч кимге ишенбей, катып жүргөн ырлар жыйнагын сактаган), ошол учурда жаңы гана актёрдук карьерасын баштаган Владимир Высоцкийден да түрдүү жардамын аяган эмес. Высоцкий Пушкин атындагы театрда иштеп, татыктуу роль аткарууну күтүп жүргөн, бирок ала алган эмес. Ошол учурда аябай ичкиликке берилген актёр жумушка бир нече жума келбей койгон. Раневскаянын кийлигишүүсү менен гана ал жумуштан алынбай калган.

Эл арасында айтылып калган сөздөрү:

"Мен ар бир адамда жашаган Кудайга ишенем. Жакшы бир нерсе жасасам, бул Кудайдын жасаганы деп ойлойм".

"Талант дегенди өзүнө өзү ишенбөө, өзүнүн кемчиликтерине жана өзүнө канааттанбоо деп ойлойм. Бирок мындай нерсени шыгы жок адамдардан кезиктирген эмесмин".

"Болгону эч нерсени каалабай калсаң, баары ишке ашат".

"Чыныгы эркек - бул аялдын туулган күнү качан болорун билип, бирок канча жашка толгонун билбеген эркек. Ал эми аялдын туулган күнү качан экенин билбей, канча жашта экенин билсе, демек, ал күйөөсү".