Улуттук медициналык академиянын ректору болуп Индира Кудайбергенова дайындалды

Өкмөт башчы Сооронбай Жээнбеков Иса Ахунбаев атындагы Кыргыз улуттук медициналык академиянын ректорлук кызмат ордуна Индира Кудайбергенованы дайындады. Бул тууралуу буйрукка Сооронбай Жээнбеков бүгүн, 20-июлда кол койгонун өкмөттүк аппараттан билдиришти.

Эскерте кетсек, үстүбүздөгү жылдын 30-июнь күнү Иса Ахунбаев атындагы Кыргыз улуттук мамлекеттик медициналык академиясынын ректорун шайлоо болуп, 185 добуш менен Ишенбек Сатылганов алдыга чыкса, 162 добуш менен Доктурбек Адамбеков кийинки орунга чыккан. Ал эми 7 талапкердин ичинен жалгыз талапкер аял Индира Кудайбергенова 136 добуш алган. Жыйынтыгында 3 талапкердин тизмеси Кыргыз Республикасынын Өкмөтүнө кароого жиберилген болчу.

Хирург, медицина илимдеринин доктору, профессор Индира Кудайбергенова 1956-жылы 24-мартта Кочкор районундагы Кочкор айылында туулган. 1979-жылы Медициналык институтту аяктаган.

1979-жылдан Бишкектеги Республикалык клиникалык оорукананын дарыгери;
1983-1985-жылдары клиникалык ординатор;
1985-1988-жылдары аспирант;
1988-1991-жылдары госпиталдык хирургия кафедрасында ассистент;
1991-1994-жылдары Семашко атындагы Москва медициналык стоматология институтунун докторантурасында окуган;
1994-1997-жылдары Кыргыз мамлекеттик медицина академиясынын онкология жана нур менен диагноз коюп дарылоо кафедрасында профессор;
1997-жылдан ошол эле кафедранын башчысы жана Кыргыз онкология жана радиология илимий-изилдөө институтунун директору.
Жалпы хирургия, маммология, пластикалык хирургия боюнча адис. 25 илимий эмгектин (анын ичинде 1 монография, 3 ойлоп табуу) автору.