Ош шаарындагы оңдолуп жаткан жолдордун абалы текшерилди (фото)

Ош шаарынын мэри Айтмамат Кадырбаев тийиштүү мекемелердин жетекчилери менен биргеликте шаардын негизги жана ички жолдорунда жүргүзүлүп жаткан чуңкурларды бүтөө иштерин текшерди.

Кадырбаевдин айтымында, жолдор сапаттуу болуш үчүн тынымсыз көзөмөл жана мыкты техника болуусу зарыл. Андыктан ал жагы да учурда сүйлөшүлүп жатканын кошумчалады. Бул тууралуу 20-июлда мэриянын маалымат кызматы билдирди.

“2016-жылга карата чуңкурларды бүтөө иштеринде негизинен Ак-Буура дарыясынын оң жана сол жээк бөлүгү жана Амир-Темир кичи районунун жолдору боюнча план түзүлүп, анын негизинде 17,0 миллион сомго тендер өткөрүлгөн. Тендерди "Сын-Таш" ишканасы 11 687 000 сомго утуп, бүгүнкү күндө чуңкурларды бүтөө иштери жүргүзүлүп жатат. Акчаны үнөмдөп, жолдорду каалаган учурда, кайсы мезгил болбосун оңдоп кетүүнү пландап, атайын техника сатып алууну көздөп турабыз”, - деди Кадырбаев.

Аталган көчөлөрдөгү чуңкурларды бүтөө иши сентябрь айынын акырына чейин аяктайт. Бүгүнкү күндө Ош шаарынын М.Али-Жиннах жана Алиев көчөлөрүндө жолдорду оңдоо иштери жүрүп жатат.