Холли Холм: "Валентина Шевченко мыкты мушкерлердин бири, мени чоң сыноо күтүп турат"

Эрежесиз мушташ боюнча 61 килограмм салмакта UFC уюмунун экс-чемпиону Холли Холм 23-июлда Валентина Шевченкого каршы беттеш тууралуу ой бөлүштү. 34 жаштагы спортчу журналисттер менен болгон маегинде Валентина Шевченкону теңге албай коюу жаңылыштык экенин баса белгиледи.

"Мен Миша Тейтке утулуп калган соң күчтүү болуп 8 бурчтукка кайтып келдим. Жеңилүү мага тынымсыз аракеттенүү керектигин үйрөттү. "Кээде утуласың, кээде утасың" деген кепке кошулбоо керек. Мен ар бир беттеште жеңүүчү аталгым келет. Валентина бул салмактагы эң күчтүү спортчулардын бири. Мен жоопкерчиликти сезип, жеңиш үчүн болгон аракетти жумшашым керек. Мени чоң сыноо күтүп турат. Биз акыркы беттеште Валентина Шевченко бразилиялык Аманда Нунез менен беттеште өзүн кандай көрсөткөнүн көрдүк. Беттеш дагы бир канча убакытка созулганда Валентина утуп чыкмак. Жыйынтыгында Нуньес чемпиондукту камсыздады", - дейт спортчу.

Кыргыз жеринде туулуп, чет өлкөдө карьерасын улантуу үчүн Перуга көчүп кеткен Валентина Шевченко менен америкалык Холли Холмдун ортосундагы беттеш 23-июлга пландалган. Беттеш АКШнын Чикаго шаарында орун алат.