Бишкекке малайзиялык туристтердин дагы бир жоон тобу келди

Кечээ, 24-июль күнү малайзиялык туристтердин дагы бир жоон тобу Бишкекке келип конду. Баш-аягы 40ка чукул турист келди. Алар бир аптанын ичинде Бишкек шаарында, борборго жакын жайгашкан Ала-Арча эс алуу багында, Ысык-Көлдө, ошондой эле өлкөбүздүн башка дагы кооз табиятынын кучагында болушат.

Бул сапардын уюштуруучусу - былтыр түзүлгөн "Ала-Тоо" Кыргыз-Малайзия достук коомунун мүчөсү Фарра Фаттах. Ал мындай дейт: “Жер кезер катары бул өлкөнү изилдеп көргүм келди. Уникалдуу, жаңы жана кызыгуу жараткан жерге дайыма барууну каалачумун. Бул уникалдуу мамлекет Малайзияда эми билине баштады”.

Малайзиялык туристтер жергебизге куру кол келбей, "Кара жорго" бийин даярдай келишкен. Сапар "Ала-Тоо" Кыргыз-Малайзия достук коому жана Малайзиядагы Кыргыз Республикасынын элчилигинин колдоосу менен уюштурулган.