Транспорт жана жол министри айдоочулардын нааразычылыктары боюнча атайын комиссия түзүп иштей баштады

Автомобилдик жана сууда сүзүү транспорту мамлекеттик агенттигинин жетекчисине нааразы болгон айдоочулар өкмөт өкүлдөрү жана транспорт жана жол министри менен жолугушту. Бул тууралуу бүгүн, 27-июлда Транспорт жана жол министрлигинин басма сөз кызматынан билдиришти.

Белгилей кетсек, буга чейин айдоочулар "Биздин укугубуз тебеленип жатат. Өкмөт бизди карабай койду. Автомобилдик жана сууда сүзүү транспорту мамлекеттик агенттигинин жетекчиси Деңиз Сулайманов 9 кызматкерди мыйзамсыз жумуштан алды" деген нааразычылыктарын айтышкан.

Ал эми нааразычылык билдирип жаткан Жумагүл Сайбекова менен байланышканыбызда ал өз сөзүндө: "Автомобилдик жана сууда сүзүү транспорту мамлекеттик агенттигинин айдоочуларынын талабын аткарууга 10 күн убакыт берилди. Транспорт жана жол министри атайын комиссия түзүп, Автомобилдик жана сууда сүзүү транспорту мамлекеттик агенттигинин жетекчиси Деңиз Сулаймановдун ишмердүүлүгүн текшерип жыйынтык чыгарабыз деген чечимге келди", - деп билдирди.

Нааразы болгон айдоочулар өлкөнүн биринчи вице-премьер-министри Мухаммедкалый Абылгазиев менен жолугушкан. Жыйынтыгында министр маселени чечерин айткан.