СУПЕРСТАН: Күйөөгө тийүүгө шашылгандын кажети барбы?

SUPER.KG порталынын "Суперстан" бөлүмүндө "Күйөөгө тийүүгө ашыкпаган кыздар" деген тема талкууга алынууда.

Темадагы билдирүүлөр:

"2050-жылга чейин Кытай менен Индияда үйлөнгөнгө аялзаты калбай, бойдок эркектердин саны 60 миллионго жетерин жазып чыгышкан. Азияда жалгыздыкты жактаган, никеден баш тарткан аялдардын көбүнүн материалдык абалы айрым эркектердикинен жогору. Ал тургай карыган ата-энесин, бир туугандарын баккан азиялык аялдар да четтен чыгат. Японияда бойдок аялдар аптасына 30 саат ордуна 40 саат иштеп, баласы, күйөөсү үчүн карьерасын курмандыкка чалгысы келбейт. Бирок коомдо “Качан күйөөгө тиесиң?” деген стереотип жоголбой келет. Бизде да акыркы жылдары турмушка чыкпай жүргөндөр четтен чыгат".

"Эч шашылбагыла, бирок шайтанга азгырылбагыла, кыздар. 35 жашта турмуш курсаӊ деле, Кудайым берсе бала жытын искейсиң. Эӊ негизгиси, бүтүн үй-бүлө, жакшы билим, тарбия болуп калды азыркы заманда".

"Шашылсаӊ да, шашылбасаӊ да баары Кудайдан. "Буйруп койгон тагдырга жай бассаң да жетесиӊ, буйрубаган тагдырга чуркасаң да жетпейсиӊ" демекчи, "кыздын базары бир жолу ачылат" деп элибизде бекер айтпагандыр. Ошондуктан базарыңар келгенде, колдон чыгарбай кармап калууңар керек. Ар нерсенин өз убагы менен болгону жакшы. Турмушка аттанарда жети өлчөп, бир кесүү керек".

"Шашкан кыз эрге жетсе да, этеги жерге жетпейт", "отурган кыз ордун табат, тапканда да зорун табат" дейт элибизде".

"Бүгүнкү күндө турмушка шашылбай эле чыгыш керек деп ойлойм. Анткени канчалаган жаш кыздарды ала качып алышат да, көп өтпөй турмуштары болбой калып жатат. Көпчүлүк учурда кыздардын тагдыры бузулуп жатат, балдар башка аял алып жашай беришет. Ал эми шашпай турмушка чыккан кыздардын турмушка, үй-бүлөлүк жашоого болгон көз караштары өзгөрүп, турмушту талдап калышат. Алар жеӊил ойлуулук кылбай, ар бир сөзгө маани берип, жашоого аракет кылышат".

Талкууга кошулгуңуз келсе, бул жакка кириңиз.