Транспорт министрлиги Бишкек-"Манас" аэропорту жолунан "Ата-Бейит" мемориалдык комплексинин жолуна көчүрүлгөн арчалар куураган эмес деп танууда

Бишкек-"Манас" аэропорту жолунан "Ата-Бейит" мемориалдык тарыхый комплексинин жолуна көчүрүлгөн арчалар куурап жатат. Транспорт жана жол министрлигинин басма сөз кызматы менен байланышканыбызда арчалардын куурап жатканын четке какты.

"Арчалар куураган эмес. Болгону бир аймактан экинчи аймакка көчүрүлгөндө аба алмашып, оордук келиши мүмкүн. Анткени Бишкек шаарынын аймагы деңиз деңгээлинен 600-700 метр бийик болсо, "Ата-Бейит" аймагы 1600-1700 метр бийик. Адистердин айтымында, арчалар отурукташып жатат. Учурда арчаларды дарылап, сугаруу иштери жүргүзүлүүдө", - деп билдиришти басма сөз кызматынан.

Бишкек-"Манас" аэропорту жолуна 2010-жылы тигилген 1800 түп жаш арчанын 817си жолду оңдоп-түзөө иштерине байланыштуу "Ата-Бейит" комплексине көчүрүлгөн. Ал эми 397 түбү "Ош" Эл аралык аэропортуна, 600 даанасы "Ала-Арча" мамлекеттик резиденциясына көчүрүлгөн.