Республика боюнча жогорку окуу жайларында бюджеттик орундар толбой калды

Республиканын жалпы окуу жайларынын бюджеттик орундарына абитуриенттерди кабыл алуунун 3-туру өттү. Бул тууралуу Билим берүү жана илим министрлиги бүгүн, 2-августта билдирди.

ЖОЖдордун берген маалыматына ылайык, акыркы турдун жыйынтыгы боюнча окууга тапшырган абитуриенттердин саны 4604кө жетти. Өткөн жылга салыштырмалуу бул жылы бюджеттик орундар эки эсе толду. Ошону менен бирге төмөнкү тармактагы жогорку окуу жайларынын гранттык орундары толбой калды: өндүрүш тармагындагы адистиктер, "физика-математикалык билим" багытындагы педагогикалык адистиктер. Гранттык орундардын бош калышына математика, физика сабактары боюнча предметтик тесттин төмөн көрсөткүчтөрү себеп болгон.

"Эскерте кетсек, бекитилген график боюнча, абитуриенттерди кабыл алуу 11-июлдан 30-июлга чейинки аралыкта 3 этаптан турган. Биринчи турда 4932 гранттык орун болсо, сынакка 26 миң абитуриент катышып, 2610 абитуриент алынган. Экинчи турдун башталышына 2322, үчүнчү турга 779 гранттык орун калып, 451 абитуриент кабыл алынган", - деп айтылат министрликтин маалыматында.