Ала-Букага Өзбекстандын аймагы аркылуу тартылган электр чубалгысы өлкө аймагына чыгарылды

Ала-Букага Өзбекстандын аймагы аркылуу тартылган электр чубалгысы өлкө аймагына чыгарылды. Бул тууралуу бүгүн, 2-августта "Жалал-Абад электр" ачык акционердик коомунун басма сөз катчысы Жыпариза Үмөталиева билдирди.

"Электр жарыгын Шекафтар, Ажек айылдары Өзбекстан аркылуу алып жүргөн. Электр чубалгылары оңдоого муктаж болуп калганда чек арадан өтө албай кыйынчылык жаралчу. Мындай абал буга чейин бир канча жолу кайталанып келген эле. Бүгүнкү күндө электр чубалгысы толугу менен Кыргыз Республикасынын аймагына чыгарылды", - деп кошумчалады Үмөталиева.

Маалыматка ылайык, өлкө аймагына 5,5 чакырым жаңы аба чубалгысы тартылып, аталган айылдын жашоочуларына пайдаланууга берилген. Электр чубалгысын тартуу үчүн техникаларга жол салынып, жаңы мамы орнотууга жалпысынан 14 миллион 589 200 сом каражат жумшалган.