Бишкекте "зордукталды" делген 87 жаштагы улгайган аял арыз жазуудан жана экспертизадан өтүүдөн баш тарткан

Бишкек шаарында "зордукталды" делген 87 жаштагы улгайган аял арыз жазуудан жана экспертизадан өтүүдөн баш тарткан. Бул тууралуу бүгүн, 3-августта SUPER.KG порталына Бишкек шаардык ички иштер башкы башкармалыгынан билдиришти.

"Бул тууралуу маалымат түшкөндө окуя болгон жерге Бишкек ШИИББинин да кызматкерлери барышкан. Иликтөө иштеринин алкагында "зордукталды" делген 87 жаштагы жабырлануучу арыз жазуудан жана соттук-медициналык экспертизадан өтүүдөн баш тарткан. Ошондой эле ал өз сөзүндө эч кандай зордуктоо болбогонун билдирген", - деп билдиришти Бишкек ШИИББинен.

Айта кетсек, "Тез жардам" кызматы бүгүн тараткан маалыматта кечээ аталган кызматтын нөөмөт бөлүмүнө "Фучик атындагы сейил бактан аялды зордуктап кетти" деген билдирүү түшкөнү жана окуя болгон жерге барган кызматкерлер аялды белгисиз жаран зордуктап кеткенин аныкташкандыгы тууралуу билдирүү тараткан.