Ошто Жалал-Абад облустук ички иштер башкармалыгынын кызматкери адам уурдоого шектелип кармалды

Ошто Жалал-Абад облустук ички иштер башкармалыгынын кызматкери адам уурдоого шектелип кармалды. Бул тууралуу бүгүн, 3-августта Ош шаардык ички иштер башкармалыгынан билдиришти.

Кытай жаранын уурдоого шектелген милиция кызматкери өткөн жумада кармалган. Ош шаардык сотунун чечими менен ал бир айга камакка алынган.

“Үстүбүздөгү жылдын июнь айынын ортосунда Ош шаарында жашап жаткан Кытай жараны жоголуп, аны издөө иштери жүргөн. Кийин жоголгон адамдын унаасы Ош шаарындагы көчөлөрдүн биринде табылган, бирок азыркыга чейин өзүнүн кайда экени белгисиз болууда. Учурда тергөө иштери жүрүп жатат”, - деп билдирди Ош шаардык ички иштер башкармалыгы.

Кылмышка шектелген жаран Жалал-Абад облустук ички иштер башкармалыгынын 10-бөлүмүнүн кызматкери экени аныкталган.

Айта кетсек, 10-бөлүм мыйзамсыз миграция, экстремизм жана терроризмге каршы күрөшөт.