Бишкекте "кызганычтан улам аялын өлтүргөн" деп шектелген жаран аны жоолугу менен муунтуп өлтүргөнү белгилүү болду

Бишкекте "кызганычтан улам аялын өлтүргөн" деп шектелген жаран аны жоолугу менен муунтуп өлтүргөнү белгилүү болду. Бул тууралуу бүгүн, 5-августта SUPER.KG порталына Бишкек шаардык ички иштер башкы башкармалыгынан билдиришти.

Маалыматка ылайык, кылмышка шектүү катары кармалган маркумдун 1984-жылы туулган Д.З. аттуу күйөөсүнө "адам өлтүрүү" беренеси менен кылмыш иши козголду. Кылмышка шектүү күнөөсүн мойнуна алып, аялын жоолугу менен муунтуп өлтүргөнүн билдирген. Ошондой эле ал окуядан кийин өз жанын кыюуга аракеттенгенин да кошумчалаган. Учурда ал убактылуу кармоочу жайга камакка алынып, бул факт боюнча тергөө амалдары жүрүүдө.

Эске салсак, 4-августка караган түнү саат 02:50 чамасында "102" кызматына Трудовая көчөсүндөгү үйлөрдүн биринен адам өлтүрүү фактысы катталганы тууралуу билдирүү түшкөн. Аталган дарекке келген кызматкерлер 27 жаштагы келин өлтүрүлгөнүн аныкташкан. Иликтөө иштеринин алкагында маркумдун күйөөсү аялы уктап жатканда аны муунтуп өлтүргөнү аныкталган.