Рио-2016: Сууда сүзүү боюнча кыргыз спортчусу Дарья Таланова жарым финалга өтө албай, мелдештен четтеди

Кыргыз спортчусу Дарья Таланова "Рио-де-Жанейро-2016" Олимпиадасынын алкагында 7-августта сууда сүзүү боюнча жарышка түштү. Бирок ал алдынкы 16 спортчунун катарына кире албай, мелдештен четтеди. Бул тууралуу мелдештин расмий сайты кабарлайт.

Маалыматка ылайык, 7-августта 100 метр аралыкка кыз-келиндер арасында жарыш орун алды. Брасс стилиндеги жарышка 43 спортчу катышты. Д.Таланова 100 метр аралыкты 1 мүнөт 10,94 секундада багынтканы менен, 33-орунду ээлеп калды.

Спортчу жарым финалга өтүү үчүн алдынкы 16 спортчунун катарын толуктоосу керек эле. Бирок, тилекке каршы, спортчубуз мелдештен четтеп калды.