Иззат Артыковдун келинчеги Айгерим Замирбекова: "Иззат жеңет, медаль алып келет деп ишенгенбиз" (сүрөттөр)

Дүйнөлүк Олимпиада оюндарында 2008-жылдан бери бир да спортчу медаль тагынып кыргыз элин кубанта элек болчу. Арадан 8 жыл өтүп, кайрадан өлкөбүздүн желеги дүйнөлүк оюндар өтүп жаткан Бразилиянын Рио-де-Жанейро шаарында желбиреди. Бул ирет жеңишти оор атлетчи Иззат Артыков алып келди. "Тыл бекем болсо, баарын жеңүүгө болот" дегендей, Иззаттын бекем тылы болгон келинчеги менен байланыштык. Бир айдан кийин эне болор алдында турган Айгерим Замирбекова SUPER.KG`ге берген маегинде жолдошунун жеңерине ар убак ишенгенин, түз эфирди көрүп жатып аябай толкунданганын айтат.

"Түз эфирде көрүп жатып аябай толкундандым. Сезимдерди сөз менен айтып берүү мүмкүн эмес. Азыр да толкунданып жатам. Спортчулардын жеңилип жатканына карабай "Иззат жеңет, медаль алып келет" деген ишенимди жоготкон жокмун. Жеңгенин көрүп кубандык, көзүбүзгө жаш алдык", - дейт спортчунун келинчеги.

Иззат Артыков 15 жылдан бери спорт менен алектенет. 2015-жылдын декабрь айында үйлөнгөн спортчу үлпөт тоюнан соң бир жума өтпөй Олимпиада оюндарына даярдануу үчүн кеткен. "Жумасына бир-эки жолу үйгө келчү. Калган убактысынын баарын даярданууга жумшады. Бул учурда тынчын албай, түшүнүү менен жолдошумду колдоп турдум. Мына эми эмгеги кайтып, жеңишке жетишти. Мындан ары да спортту таштап салбай, кийинки оюндарга даярданып, мындан да көп ийгиликтерге жетишет деп ишенем".

Спортчулар күчтүү болуш үчүн жакшы тамактанышы зарыл эмеспи. Оор атлетика менен алектенген Иззат камыр тамактарды жакшы көрөт. Андыктан Айгерим Замирбекова даамдуу тамактарды жасап берет.

Иззат Артыков үй-бүлөдө эки бир тууган, бир эжеси бар. Эки баласын жалгыз тарбиялаган спортчунун энеси Орусияда эмгектенет. Уулунун жеңишин уккан апасынын учурда кубанычы коюнуна батпай турган кези.

Спортчу айына 12 миң сом төлөп батирде жашайт. Келинчегинин айтымында, спортчунун алган стипендиясы азырынча экөөнө жетет.