Ысык-Көлдө тарыхый "Үркүн" көркөм тасмасы тартылып бүттү

Ысык-Көлдө тарыхый "Үркүн" көркөм тасмасы тартылып бүттү. Бул тууралуу бүгүн, 11-августта SUPER.KG порталына тасманын продюсери Мухтар Атаналиев билдирди.

Аталган тасма Ысык-Көлдүн Дархан айылында, Саруу айылынын Жыл-Куу тоосунда тартылган. Көркөм тасманы тартууда Медин Учкеев башкы режиссёрлук кылган.

"Буга чейин тарыхый окуяны камтыган "Үркүн" тасмасын тарталы деп мерчемдеп келгенбиз. Ушул жылы олуттуу ишке киришип, жыйынтыктадык. Кийинки муун тарыхыбызды билсин, унутта калбасын деп 1916-жылдагы каргашалуу окуяны тасмага тартууну эп көрдүк. Башка эл "кыргыз эли Советтер Союзунун учурунда да, азыр да жакшы жашап жатат" деп айтышы мүмкүн. Тасма аркылуу биз бүгүнкү жакшы жашоого кыйынчылыктар жана күрөш менен жеткенибизди чагылдырууну максат кылдык. Тасманын тартылышына "Саякбай" манасчылар коому көмөк көрсөтүштү", - дейт Атаналиев.

"Тасманы тартуу иштери 2015-жылдын сентябрь айында башталып, бүгүнкү күндө толугу менен бүттү. Учурда үн берүү, монтаждоо иштери башталган. Монтаждоо иштери бүтсө, тасма канча сааттык экени, коомчулукка көрсөтүлчү убакыты белгиүү болот", - деп кошумчалады тасманын экинчи режиссёру Бурул Асылбекова.

Фильмдин башкы каарманын Жаштар театрынын актёру 23 жаштагы Кымбатбек Алимжан уулу аткарганы маалым болду.