Кытай. Жумуш таба албаганына ачууланган аял шаар ичиндеги 22 банкоматты талкалап салды

Кытайдын Сяньян шаарынын 37 жаштагы тургуну жумуш таба албаганына ачууланып шаардагы 22 банкоматты талкалап салды. Аты айтылбаган аялдын фамилиясы - Ли. Ал банкоматтарды талкалоодо кыш жана жоон жыгач колдонгону маалым болду. Бул тууралуу бүгүн, 11-августта чет элдик басылмалар кабарлайт.

Камерага аялдын банкоматка жакын келип, аны бир нече секундада талкалап, андан соң кылмыш жасаган жерден изин суутканы түшүп калган. Арадан көп өтпөй анын өздүгү такталып, ал колго түшүрүлгөн. Жергиликтүү бийлик өкүлдөрүнүн маалыматына ылайык, аял күйөөсү менен ажырашып кеткен. Жумуш табууга болгон аракети текке кетип, ал жумушка орношо алган эмес.

Полиция кызматкерлеринин "Эмне себептен бул кадамга бардыңыз?" деген суроосуна "Менде бир да тыйын жок. Көчөдө тилемчилик кылып жан багам. Дагы эмне кылышым керек? Ата-энем каза болуп калган" деген жооп узаткан. Линин банк жетекчилигине келтирген жалпы зыяны 550 миң юанды (87 миңден ашуун доллар) түзгөн.