Таласта “классташын өлтүргөн” деп шектелген эки мектеп окуучусу үй камагына чыгарылды

Таласта “классташын өлтүргөн” деп шектелген эки мектеп окуучусу үй камагына чыгарылды. Бул тууралуу бүгүн, 12-августта Талас облустук сотунан билдиришти.

Буга чейин, тактап айтканда, 21-июль күнү Талас райондук соту 9-класстын окуучусу Б.Кутман менен К.Айбекти Талас облустук ички иштер башкармалыгынын убактылуу кармоочу жайында 26-августка чейин камап туруу чечимин чыгарган. Буга макул болбогон айыпкер тарап Талас облустук сотуна кайрылышкан. Облустук сот райондук соттун чечимин жокко чыгарып, кылмышка шектүүлөрдү 21-августка чейин үй камагына чыгарды.

Айта кетсек, окуя үстүбүздөгү жылдын 25-майында Талас районунда болгон. Анда каза тапкан мектеп окуучусунун классташтары аны токойго ээрчитип барышып, “Эмне үчүн экскурсияга акчадан жардам бербейсиң?” деп сабашкан. Эс-учун жоготкондон кийин аны үйүнүн жанындагы жыгач тактага жөлөп качып кетишкен. Анын кесепетинен ур-токмокко кабылган окуучу каза тапкан. Бул кылмышка шектүү катары 2000-жылы туулган Б.Кутман жана К.Айбек кармалган. Аларга Кылмыш-жаза кодексинин 104-беренеси (саламаттыкка атайылап оор залал келтирүү) боюнча кылмыш иши козголгон.