Шашылыш билдирүү! 17-18-августта айрым райондордо нөшөрлөгөн жамгыр жаап, сел жүрүшү күтүлөт

17-18-августта өлкөнүн айрым райондорунда мезгил-мезгили менен жаан жаап, күн күркүрөшү, бийик тоолуу райондордо кар жаашы күтүлөт. Бул тууралуу бүгүн, 16-августта Өзгөчө кырдаалдар министрлигинен билдиришти.

Ош, Жалал-Абад, Баткен, Ысык-Көл облустарынын айрым жерлеринде жаан-чачын катуу жаап, кээ бир райондордо батыштан соккон шамалдын ылдамдыгы секундасына 18-23 метрге жетет. Абанын күндүзгү температурасы төмөндөйт.

"Мындай жаан-чачындуу аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда мал кармоону кыйындатат. Күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондорунда сел жүрүшү мүмкүн", - деп айтылат маалыматта.