Бишкектеги ири провайдер интернетке баа өсүшү мүмкүн экенин билдирди

Бишкектеги ири провайдерлердин бири өзүнүн расмий сайтына “Бизден жогору турган провайдер интернеттин баасын жогорулатып жаткандыгы тууралуу маалымдайбыз. Компания бааны өзгөртпөөгө бардык күчүн жумшоодо. Эгер сүйлөшүүлөр күтүлгөндөй жыйынтык бербесе, биздин да тариф өзгөрүшү мүмкүн. Ал эми жакынкы күндөрдө сырткы каналдар боюнча интернеттин ылдамдыгы төмөндөөрүн кошумчалайбыз”, - деп жазып чыкты.

Буга чейин SUPER.KG порталында Казакстанда интернет кызматтарынын эки эсеге кымбатташы Кыргыз Республикасындагы бааларга да таасирин тийгизиши мүмкүн экени жазылган.

Байланыш операторлор ассоциациясынын башчысы Нурбек Абасканов татаал табигый тандоо болорун билдирди.

“Бул жерде экономикалык логика жүгүртүү оңой. Мисалга, мурун орточо провайдер 25 миң доллар төлөсө, жаңы баалар күчүнө киргенден кийин 80 миң доллар төлөөгө туура келет. Орточо провайдер мынча акча таппайт. Ошондуктан провайдер же бааны көтөрбөй, өзүнүн чыгашасына иштөөнү, же көтөрүп кардарды жоготууну тандашы керек болот. Биринчи дагы, экинчи дагы көрүнүштө компания жапа чегет, ошого байланыштуу жабылат. Ошентип, Кыргыз Республикасынын интернет рыногунда провайдерлердин саны азайып, ири болгондору гана калат. Кандай болгон күндө дагы жөнөкөй интернет колдонуучуга бул иштин кесепети тиет”, - деди Нурбек Абасканов SUPER.KG'ге.

Эске салсак, интернетке болгон баа өсүшү мүмкүн экени “Казактелеком” ишканасы баалардын өзгөрөрү тууралуу маалымдагандан кийин айтыла баштаган.