Ала-Бука районундагы Орто-Токой суу сактагычынын аймагына мыйзамсыз кирген өзбек милиция кызматкерлерине ок атылганы айтылууда

Ала-Бука районундагы Орто-Токой суу сактагычынын аймагына мыйзамсыз кирген өзбек милиция кызматкерлерине ок атылганы айтылууда. Бул тууралуу бүгүн, 19-августта өлкөдөгү айрым
интернет-сайттар күч органдарындагы өздүк булактарына шилтеме берүү менен жазып чыгышты.

Анда “17-август күнү суу сактагычтын аймагына 10го жакын өзбек милиция кызматкерлери мыйзамсыз киришкен. Аларга атайын даярдыктагы “Скорпион” отряды эскертүү иретинде ок аткан. Анда соң алар качып кетишкен. Суу сактагычты кайтарган бир өзбек милиция кызматкери кармалды” деп айтылат.

Бул маалыматты Мамлекеттик чек ара кызматы, Жалал-Абад облустук ички иштер башкармалыгы жана Куралдуу күчтөрдүн Башкы штабы тастыктаган жок.

Айта кетсек, Ала-Букадагы Орто-Токой суу сактагычы Советтер Союзунун учурунда курулуп, ошондон бери коңшу Өзбекстан өлкөсү пайдаланып келген. Суу сактагыч чек арадан 13 чакырым бери жайгашкан. 2016-жылдын май айында Өзбекстан пайдаланып жаткан бир катар объектилер мамлекеттин менчигине өткөн. Алардын арасында Орто-Токой суу сактагычы да бар болчу.