Кыргыз Республикасынан барган зыяратчылардын саламаттыгын 8 дарыгер көзөмөлдөйт

Кыргыз Республикасынын Мусулмандар дин башкармалыгынын ажылыкты уюштуруу боюнча көчмө штабы Мекке шаарындагы Кыргыз жеринен барган зыяратчылардын саламаттыгын көзөмөлдөөчү медициналык пункттар менен таанышып чыкты. Муфтияттын басма сөз кызматынан билдиришкендей, зыяратчылардын саламаттыгын 8 дарыгер көзөмөлдөйт.

"Медициналык пункттар дарыгерлерге керектелүүчү шаймандар, биринчи жардамга керектелүүчү бардык дары-дармектер менен жабдылган. Кыргыз жеринен барган дарыгерлер мына ушул дарылоо пункттарында иш алып барышмакчы. Учурда КМДБнын ажылыкты уюштуруу штабы тарабынан сатылып алынган дары-дармектердин баары жарандардын саламаттыгы үчүн колдонулуп, дарыгерлер алардын саламаттыгына кам көрүшмөкчү. Учурда Сауд Арабия Падышалыгынын Саламаттыкты сактоо министрлиги менен дарыларды сактоочу жай жана техникалык жардамдар боюнча сүйлөшүүлөр жүрүүдө", - деп айтылат маалыматта.