Рио-2016: Балбаныбыз Айаал Лазарев алгачкы беттешинде утулуп, медаль үчүн кармаштан четтеп калды

"Рио-де-Жанейро-2016" Олимпиадасында бүгүн, 20-августта эркин күрөш боюнча 86 жана 125 килограмм салмактык бөлүктөрдө медаль ойнотулууда. 125 килограмм салмакта килемге чыккан балбаныбыз Айаал Лазарев алгачкы беттешинде утулуп калды.

Ал мелдештин жарым чейрек финалдык баскычында польшалык спортчу Роберт Баран менен кез келди. 3 мүнөттөн турган алгачкы бөлүктө балбаныбыз 1 упай алып, эсеп катыштыгында алдыда болду. Экинчи бөлүктө Айаал Лазаревге эскертүү берилип, калыс 30 секунда аралыгында упай алууну буйруду. Бул аралыкта спортчубуз упай ала албагандыктан, 1 упай атаандашына ыйгарылды. Андан соң Баран чабуулга өтүп, мекендешибиз аны оодарып кетүү аракетин көрдү. Бул аракетинен майнап чыкпай, ыңгайлуу мүмкүнчүлүктү ийгиликтүү ишке ашырган атаандашы 4 упай алды. Жыйынтыгында 5:1 эсебинде уткан Роберт Баран чейрек финалга чыкты.

Р.Баран финалга чыкса, А.Лазарев коло медаль үчүн кармашты улантуу мүмкүнчүлүгүнө ээ болмок. Бирок польшалык спортчу чейрек финалда америкалык балбан Тервел Длагневге утулду. Жыйынтыгында балбаныбыз мелдештен четтеп калды.