Рио-2016: Неймар баштаган футболчулар Бразилияга алтын медаль утуп беришти

21-августка караган түнү "Рио-де-Жанейро-2016" Олимпиадасында футбол боюнча мелдеш жыйынтыкталды. Алтын медаль үчүн беттеште Бразилия курамасы Германия менен беттешип, пенальтилер сериясында утуп алды (5:4). Беттештин негизги убактысы 1:1 эсебинде аяктады.

Неймар беттештин 27-мүнөтүндө эсепти ачып, командасын эсеп катыштыгында алдыга алып чыкты.
2-таймда Германия олимпиадалык курамасы эсепти теңеди (Максимилиан Майер айырмаланды). 5:4 эсебинде аяктаган пенальтилер сериясында Неймар чечүүчү голду киргизди. Жыйынтыгында Бразилия олимпиадалык курамасы алтын медаль тагынды. Буга чейин бразилиялыктар тарыхта Олимпиаданын алтынын тагынып көрүшкөн эмес.

Коло медаль үчүн болгон беттеште Гондурас-Нигерия беттеши орун алып, 3:2 эсебинде нигериялыктар жеңип алышты.

Кошумчалай кетсек, үй ээси Бразилия ушуну менен Олимпиададагы 18-медалына ээ болду (6 алтын, 6 күмүш, 6 коло).