Түркиянын Газиантеп шаарындагы үйлөнүү тойдогу өспүрүм уюштурган жардыруудан 51 адам каза болду

Түркиянын түштүгүндө жайгашкан Газиантеп шаарындагы үйлөнүү тойдогу жардыруудан 51 адам каза болду. Бул тууралуу "Рейтер" басылмасы жазып чыкты.

Жардыруу 20-августта болгон. Жардыруудан кийин жергиликтүү полиция кызматкерлери жан кечтинин курунун калдыктарын табышканын "Франс-Пресс" агенттиги шаардык прокуратурага шилтеме берүү менен жазып чыккан. Өлкөнүн президентинин айтымында, терактты "Ислам мамлекети" уюштурган болушу мүмкүн. Ошондой эле Режеп Эрдоган жан кечти 12-14 жаштагы бала экенин кошумчалаган.

"Бул жардыруу эң оор болду. Учурда ооруканада ар кандай жаракаттар менен 86 адам жатат", - деген президент.

Күбөлөрдүн айтымында, каза болгондордун басымдуу бөлүгү аялдар жана алардын арасында 3 айлык наристе да болгон.

"Жарылуу тойдун акырында коноктор бийлеп жатышканда болду. Ар тарапта кан, дене мүчөлөрү жатты..." - деген 25 жаштагы Вели Кан.

"Биз мындай кандуу окуялардын токтошун каалайбыз! Аялдарыбызды жана балдарыбызды жоготконубуз биз үчүн оор болуп жатат", - дейт жергиликтүү тургун Ибрагим Өздемир.

Азырынча террордук топтордун бири дагы жардырууну моюнуна ала элек.