Казакстан. Актауда зордукталган 6 жашар кыз оор абалда жандандыруу бөлүмүндө жатат

Казакстандын Актау шаарында зордукталган 6 жашар кыз оор абалда жандандыруу бөлүмүндө жатат. Бул тууралуу жергиликтүү маалымат каражаттары жазып чыгышты.

Маалыматка ылайык, окуя 20-август күнү Актау шаарынын 1-кичи районунда орун алган. Анда чоң энеси менен жумушка келген кыз саат 12:30 чамасында жоголуп кеткен. Бир саат бою өз алдынча кызды издеген чоң энеси аны таба албай, полицияга жардам сурап кайрылган. Издөө иштеринин алкагында кыз саат 17:30 чамасында Приморский айылынын аймагынан табылган. Күндүн ысыгында сыртта кансырап жаткан кыз оор абалда ооруканага жеткирилген. Медициналык кароодон кийин анын зордукталганы аныкталган. Учурда бул факт боюнча кылмыш иши козголуп, кылмышка шектүүнү издөө иштери кызуу жүрүүдө.

"Учурда кыз оор абалда жандандыруу бөлүмүндө жатат. Дарыгерлер аны атайын өзүнө келтирбей жатышат, себеби ал оор психологиялык жаракат алды, андан сырткары башка жаракаттары да бар. Анын үстүнө кыз зордукталгандан кийин күндө көп жатып калган. Ага тиешелүү медициналык жардам көрсөтүлүп, учурда ал дарыгерлердин көзөмөлүндө", - деп айтылат маалыматта.