Бишкек-Ош жолунда кырсыкка кабылып, күйүп кеткен унаадан 4 адам каза болду

Бишкек-Ош унаа жолунда кырсыкка кабылып, күйүп кеткен унаадан 4 адам каза болгонун 24-августта Өзгөчө кырдаалдар министрлигинин маалымат кызматынан билдиришти. Маалым болгондой, унаа жолунун 439-чакырымында Фольксваген Пассат үлгүсүндөгү унаа катуу ылдамдыкта келе жатып жол четиндеги тосмону сүзүп, оодарылып кеткен. Унаада 4 адам болгон.

Айдоочу жана эки жүргүнчү кырсык болгон жерден күйүктөн каза табышкан. Учурда алардын аты-жөнү такталып жатат. Ал эми Ош шаарынын 1967-жылы туулган А.М. аттуу тургуну (аял) Таш-Көмүр шаардык ооруканасынын жандандыруу бөлүмүнөн каза болгон.

Эскерте кетсек, жол кырсыгы 23-август күнү саат 15:00 чамасында катталганын окурман SUPER.KG'ге WhatsApp аркылуу билдирген эле. "Хонда Одиссей унаасы бийиктен кулап түшүп, күйүп кетти. Унаада 5 адам болгон, экөөсү чыгып кетип, калганы белгисиз", - деп айткан окурман.