Чек ара кызматы: "Үңкүр-Тоодогу станциянын 4 кызматкерин бошотуу боюнча сүйлөшүүлөр натыйжасыз болууда"

Үңкүр-Тоодогу станциянын 4 кызматкери Өзбекстандын Жаңы-Коргон райондук ички иштер бөлүмүндө кармалууда. Чек ара кызматынан SUPER.KG'ге билдиришкендей, бул маселе боюнча эки тараптуу сүйлөшүүлөр натыйжасыз болууда. "Качан кармап кетишкени боюнча маалымат бере албайбыз, бизге 23-августта маалым болду. Ошол учурдан тартып Чек ара кызматы Өзбекстан тарап менен улам-улам сүйлөшүүнү жүргүзүп жатат, бирок натыйжа жок болууда. Өзбек тарап кармалган жарандар боюнча тынчсызданбоого чакырды", - деди Чек ара кызматынын маалымат кызматынын өкүлү.

Өзбекстан тарап мындай кадамга Ала-Букадагы Орто-Токой суу сактагычындагы Кыргыз мамлекетинин милиция постун алып салуу талабынан улам ушундай кадамга барып жатышы мүмкүн экендигин кошумчалады.

Эскерте кетсек, 22-августта Өзбекстандын милиция кызматкерлери кыргыз чек арачылары менен болгон сүйлөшүү учурунда ИИМ кызматкерин бошотууну жана суу сактагычтан Кыргыз мамлекетинин милиция постун алып салууну талап кылган.

Орто-Токой суу сактагычы Советтер Союзунун учурунда курулуп, ошондон бери коңшу Өзбекстан өлкөсү пайдаланып келген. Суу сактагыч чек арадан 13 чакырым бери жайгашкан. 2016-жылдын май айында Өзбекстан пайдаланып жаткан бир катар объектилер мамлекеттин менчигине өткөн. Алардын арасында Орто-Токой суу сактагычы да бар болчу.