Чолпон Жакупова: "Учурдагы Баш мыйзамга ылайык, депутаттардын да, президенттин да Конституцияга өзгөртүүлөрдү демилгелөөгө укугу жок"

"Жогорку Кеңештин бир топ депутаттары Конституциянын жаңы долбоору менен таанышпай эле, өзгөртүүгө "макул" деп кол коюшту". Мындай пикирин кечээ, 24-августта тегерек столдун жүрүшүндө Жогорку Кеңештеги "Бир бол" фракциясынын депутаты Чолпон Жакупова билдирди.

Ал депутаттарга президенттик аппараттан ушундай тапшырма түшкөн дейт. "Мен кесиптештерим менен сүйлөштүм. Алардын көбү долбоорду окубай эле кол коюшуптур. Башында 47 кол коюлган эле. Анан депутаттарды зордоп, бул санды 87ге жеткиришти", - деп нааразычылыгын айтты Жакупова.

"Конституцияны өзгөртүүнүн демилгечиси ким экенин мен жөндөн-жөн эле сураган жокмун. Бири президент деп жооп берип жатат, башкасы Жогорку Кеңеш деп жатат. Учурдагы Баш мыйзамга ылайык, парламенттин депутаттары Конституцияга өзгөртүүлөрдү демилгелөөгө укугу жок. Президент болсо эч кандай мыйзам долбоорун демилгелей албайт. Конституция боюнча тыюу салынган укукту өзүңөргө алып жатасыңар. Бул – кылмыш, бийликти узурпациялоо болуп саналат", - деди депутат.