Адахан Мадумаров Фарид Ниязовго "Фарид, сен кимсиң? Текебаевдин деңгээлине жетиш үчүн сага 15 диплом керек" деди

"Конституцияны өзгөртүүгө каршы пикирин айткан Өмүрбек Текебаевге ыраазычылык билдирем", - деди бүгүн, 25-августта "Биримдик жана туруктуулук үчүн" форумунда саясатчы Адахан Мадумаров.

Анын айтымында, президенттик аппараттын башчысы Фарид Ниязовго Өмүрбек Текебаевдин деңгээлине жетиш үчүн 15 диплом керек. "Аймактарда жарандар саясатта эмне болуп жатканын телеберүүлөрдөн көрүшөт. Мамлекеттик телеканалдар Конституцияга сунушталган өзгөртүүлөр талкууланып жаткан жыйындардан сюжеттерди бир тараптуу көрсөтүп жатат. Баш мыйзамды өзгөртүүгө каршы пикир айткандардын сөздөрүн элге жеткирбей жатышат. Фарид Ниязов эмне десе, кандай гана жалган сүйлөсө, ошону гана көрсөтүшүүдө. Фарид, сен кимсиң? Өмүрбек Текебаевге жетиш үчүн сага 15 диплом керек", - деди Мадумаров.

Мындан тышкары ал форумдун катышуучуларын Конституцияны өзгөртүү боюнча референдум өткөрүүгө жол бербөөгө чакырды. "Бүгүн биз бир чечимге келип, референдумга каршы пикирибизди билдиришибиз керек. Референдум өттү дегиче бүттү десек болот", - деген оюн айтты саясатчы.

Айта кетсек, аталган форумга президенттик аппараттын башчысы Фарид Ниязов чакырылган, бирок ал келген жок.