17 жаштагы лицейдин окуучусу Кыргыз өлкөсүн велосипед менен 30 күндө айланууга сапарга чыкты

Бишкектик Ринат Зарыпбек уулу Кыргыз өлкөсүн 30 күндө велосипед менен кыдырып, улуттук рекорд койгонго бүгүн, 25-августта аттанды. Бул тууралуу SUPER.KG порталына Ринат Зарыпбек уулу өзү билдирди. Ал жүрө турган жолдун узундугу 5 миң чакырымга барабар.

Ринат Зарыпбек уулу спорт менен профессионалдык деңгээлде машыкпайт. Спорттун бул түрү менен алектене баштаганына 1 жылдай болду. Буга чейин Ринат велосипеди менен 2015-жылы Ысык-Көлгө турга чыгып, 300 чакырымды 17 саатта басып өткөн. Ошондон бери алыскы сапарларга чыгып турат. Анын айтымында, бул сапардын башкы максаты - кыргыз элин дени сак жашоого үгүттөө. "Велоспорттун сүйүүчүлөрү 20-30 жаштагылар, алардын арасында бул спорттун түрүн жайылтып, адамдын мүмкүнчүлүктөрү чексиз экенин көрсөткүм келет", - дейт Ринат Зарыпбек уулу.

Ал өтө турган жолдун айрым аймактары кооптуу экенин, жолдо ар кандай оорчулуктар жараларын түшүнүп турганын айтып, бул маршрутту басып өтүш үчүн бардык мүмкүнчүлүгүн жумшай турганын билдирди. Белгилей кетсек, ал бийик тоолуу, адамдар жашабаган, жапайы жаныбарлар байырлаган аймактар аркылуу да жүрөт.

Учурда Ринат Зарыпбек уулу Бишкек шаарынан чыгып, Талас облусун көздөй бет алганын айтты.