Москвадагы өрт: Каза тапкан жарандардын туугандарына жардам берүү үчүн атайын штаб түзүлдү

Москвадагы өрттөн каза тапкан Кыргыз Республикасынын жарандарынын жакындарына жана туугандарына жардам берүүчү атайын штаб түзүлдү. Бул тууралуу бүгүн, 28-августта өкмөттүн басма сөз кызматы билдирди.

Штабды вице-премьер-министр Гүлмира Кудайбердиева жетектейт. Бүгүн жумушчу топ Москва шаарына учуп кетет. Алардын арасында өзгөчө кырдаалдар министри Кубатбек Боронов, Саламаттыкты сактоо министрлигинин, Мамлекеттик миграция кызматынын өкүлдөрү жана каза тапкандардын жакындары, туугандары бар.

Өрттөн каза тапкандарды мекенине алып келүү, жерге берүү иш-чаралары боюнча чыгымдар өкмөт тарабынан чечилет.

Айта кетсек, 27-августта Москва шаарынын түндүк-чыгыш тарабындагы Алтуфьев шоссесинде жайгашкан басмаканадан чыккан өрттөн 17 адам каза таап, 4 адам жаракат алган. Каза болгондордун ичинен 14 адам Кыргыз өлкөсүнүн жарандары.