Москвада өрттөн каза болгондорду Марат Исаев баштаган мекендештер эскеришти

Москвадагы Алтуфьев шоссесиндеги өрттөн каза болгон Кыргыз өлкөсүнүн жарандарын бүгүн, 28-августта Марат Исаев баштаган мекендештер кырсык болгон жерге гүл коюу менен эскеришти.

17 адамдын өмүрүн алган өрттөнгөн имараттын бооруна "Бизди кечиргиле" деген жазуу менен кыргыздын улуттук баш кийими - калпактын сүрөтүн илишти. Ошондой эле "Урматтуу боордоштор, жаткан жериңер жаннатта болсун!" деген эскерүү кагазын көрүүгө болот.

"Бул иш-чарага 200дөй кыргыз катышты. Эскерүүгө Москвадагы кыргыз диаспорасынын төрагасы Абдыганы Шакиров, КРнын Орусиядагы элчиси Болот Отунбаев да катышты. Дубалга каза болгондордун тизмеси илинип, гүлдөр коюлду", - дейт "Кыргыз биримдиги" коомунун мүчөсү Улан Кошматов.

Эскерте кетсек, кечээ, 27-августта Москвадагы басмаканадан чыккан өрттөн 17 адам каза болсо, алардын 14ү Кыргыз Республикасынын жарандары. Бүгүн борбор калаабыз Бишкекте да каза болгондорду эскерүү иш-чарасы болуп өттү.